Autoeraikuntza

Zenbat Gararen jarduera autoeraikuntzan oinarriturik dago eta autogestionarioa izan nahi du alor guztietan. Beraz, antolamendua eguneroko esperientzian oinarritzen da, beti ere ondo egiten dena hobetuz eta hutsak zuzenduz, teoria eta praktika etengabe elikatuz eta uztartuz.

Kudeaketaren aldetik, gauza bera esan daiteke. Funtzio bakoitzerako pertsona egokiena bilatzen dugu, funtzio hori benetan eraginkorra izan dadin. Alabaina, honek ez du esan nahi gure elkartean inor baztertzen denik, alde batetik, pertsonarik adina funtzio egon daitekeelako, eta ez alderantziz; eta, beste alde batetik, Euskararen Herrian, lehengo herrietan bezalaxe, guztiok leku bat behar eta merezi dugulako.

Baliabide alorrean, autofinantziazioa da bidea, gure ustean. Talde eta alderdi guztietatik bereiz, Zenbat Gara elkartearen beregaintasuna ziurtatzeko modu bakarra autofinantziazioa da.

Antolakuntza
Edozein elkartek bere organigrama zehatza izaten du. Zenbat Gara ez da salbuespena, baina gure kasuan bada berezitasun nabarmen bat, autogestionarioa izan nahi duela, alegia. Pertsona guztiak ezberdinak dira, bakoitza bere ahalmen eta gaitasunekin, baina, orobat, balio eta duintasun berekoak guztiak.

Hori dela eta, Zenbat Gara elkartearen organigrama funtzio eta helburu horien araberakoa izan dadin, ekinahalean gabiltza lanean egunero. Organigraman bereizten ditugun taldeak gure jardueraren funtzio nagusiei dagozkienak dira: Sormena, Pedagogia, Ekoizpen Artistikoa eta Irudia, Hedabideak, Eraketa eta Ebaluazioa.