Ludoteka tailerra

Hiztegiek dakarten definizioari jaramon eginez, jolasak, zentzu zabal batean, atsedenaldietan edo lanik ez denean denbora emateko egiten diren era guztietako jarduerak dira. Beraz, ez dago zertan haurren esparrura soilik mugatu, gehientsuok uste oker batez horrelaxe egiten dugun arren. Helduok ere badugu jolasen premia eta sarritan baliatzen gara haietaz geure aisialdia antolatzerakoan. Ludoteka Tailerrak hamaikatxo baliabide eskaintzen dizkie bertaratzen direnei, umeekin, gazteekin zein helduekin noiz zer jolas egin daitezkeen jakin dezaten. Eta jolasak barrutik ezagutzeko jolastea bera baino gauza hoberik ez dagoenez, prozedura azaldu ondoren, tailerkideek praktikan jartzen dituzte jolas guztiak. Hainbat arlo lantzen dira tailerrean, mahai jokoetatik hasi eta eskulanetaraino, jolas dinamikoak, asmakizunak, magia eta beste hainbat atal ere lantzen direlarik.