Jendaurrean hitz egiteko teknikak

Egungo gizartean gero eta ohikoago eta arruntago bilakatzen ari da jendaurrean hitz egin beharra izatea. Ahozko azterketa dela, zerbait erakusteko edo saltzeko dela, hitzaldia dela edo komunikabideen aurreko azalpena dela, guztiok izaten dugu noiz edo noiz arrotz zaigun inguruneren batean mintzatu beharra, eta horrelakoetan ezinegonak hartzen gaitu, nola hitz egin behar dugun ezin asmaturik. Tailer hau oratoriaren oinarriak lantzeko pentsatua dago teknika xume bezain eraginkor batzuen bidez. Teknikak, bestalde, hiru arlo nagusiren inguruan antolatuta daude: alderdi psikologikoa (beldurra, lotsa, inhibizioa, …), alderdi fisiologikoa (ahotsaren lanketa, ahoskera, azentua, intonazioa, …) eta alderdi linguistikoa (erregistro zuzena hautatzea, diskurtsorako joskera eta hiztegi egokiak erabiltzea eta hizkeraren zuzentasun, jatortasun eta jariotasuna bermatzea).