Irrati tailerra

Irratia, aspaldi samarrekoa izan arren, bizi-bizirik dirauen komunikabidea dugu, gertutasuna, gozotasuna eta egunerokotasuna beste ezein hedabidek ez bezala helarazten dizkigulako. Irratia, beti aldamenean izan dezakegun lagun hiztuna, albiste eta gauza jakingarriak kontatzen dizkiguna eta musika gozoa entzunarazten diguna. Zenbat Gara elkartea aspaldian ohartu zen irratiak euskaldunak trinkotzen bete dezakeen eginkizun garrantzitsuaz eta duela zenbait urte Bilbo Hiria irratia, 96,0 FM sortu zuen, Bilbo aldean euskara hutsez emititzen duen irrati bakarra, alegia. Eta orain, Bilbo Hiria irratiaren azpiegituraz baliatuz, irratigintzan murgildu nahi duten guztiei jarduera horren oinarrizko ezaugarri eta teknikak lantzeko parada eskaintzen zaie, bai alderdi teknikoari eta bai esatarien lanari dagokienez.