Interneterako sarrera tailerra

Nahi dugula eta nahi ez dugula ere, mundu digital birtualean murgilduak gara denok. Amaraun erraldoia eguneroko tresna bihurtu zaigu konturatzerako. Gainera, adituek diotenez, datorkigun iraultza teknologikoaren hasiera besterik ez omen dugu ikusi oraingoz. Eta ohi bezala, hizkuntza eta kultura indartsuenak aterako bide dira garaile iraultza berritik. Beraz, demografia txiki eta ertaineko hizkuntzek erne ibili behar dute teknologiaren gurdira garaiz igo ahal izateko. Euskarak, kasurako, buru-belarri dihardu langintza horretan eta, zorionez, geroago eta gehiago dira gure hizkuntzan topatzen ditugun web gune, atari, bilatzaile eta orriak. Hain zuzen ere, Interneterako sarrera izeneko tailerrak, euskaraz interneten nabigatzeko eta posta elektronikoa kudeatzeko hasi-masiak irakasteaz gainera, euskarak eta euskal kulturak esparru horretan dituzten baliabide guztiak profitatzen eta erabiltzen erakusten die tailerkideei.