Dantza tailerra

Beste herrialde askotan bezala, Euskal Herrian ere dantzak aparteko garrantzia izan du betidanik herritarren arteko harreman eta loturak estutzen. Eta dantza bidezko harreman horiek gure herrietako plazetan gauzatzen dira, herritar guztiena den lekuan, alegia. Zoritxarrez, Bilbon eta gainerako euskal hirietan galdu samartuta dago herritarrek beren jaiak dantzen bidez ospatzeko ohitura zaharra. Nolanahi ere, azken urteotan gero eta gehiago dira hirietarako dantzak berreskuratu nahi dituzten lagunak. Hutsune hori estaltzera dator, hain justu ere, Zenbat Gararen Dantza Tailerra, bertan han-hemengo jaietan maizenik dantzatu ohi diren euskal dantzak ikasten baitira, haietako bakoitzaren esanahi sinboliko eta kulturalak landuz.